‘Type’ ang ex-bf ng bestfriend

Dear Vanezza,

Nanliligaw po sa akin ang ex-bf ng bestfriend ko. Noong una pa man ay crush ko na siya. Hindi ko rin akalain na matagal na rin pala siyang may gusto sa akin. Pinipigilan niya lang ang sarili dahil ayaw niyang mapasama ako sa mata ng aking kaibigan. Mahigit one year na silang break nang ligawan niya ako. Nakarating sa aking bestfriend ang tungkol dito at ipinagkalat niya na niloko raw namin siya. Mahal ko po ang guy kaya lang hindi ko magawang maisantabi ang damdamin ng kaibigan ko. Sa ngayon nasa ibang bansa na po siya at regular naman po ang aming komunikasyon. Ano pong mabuti kong gawin? Nalilito po ako kung tatanggapin ko ang panliligaw niya. - Yzel

Dear Yzel,

Hindi mo kasalanan ang umibig at ibigin ng dating nobyo ng bestfriend mo. Kung nagkasira man sila ng kaibigan mo, hindi ikaw ang dahilan. Wala na sila nang pumasok ka sa eksena. Hindi naman ikaw ang gumawa ng hakbang para ligawan ka ng ex niya. Kung talagang mahal niyo ang isa’t isa, walang mali para hindi mo pagbigyan ang pagmamahalan ninyong dalawa.
Sumasaiyo,

Vanezza