Pangangaliwa ni mister ‘di mapatawad ni misis

Dear Vanezza,

Itago n’yo na lang po ako sa pangalang Gino, 29 years old, may asawa at 2 anak. Bago po duma­ting ang pagsubok na ito masaya naman po kami ng pamilya ko. Pero nung mag-abroad po ako nagkaroon ng third party sa buhay naming mag-asawa. Nagtaksil ako sa misis ko. Subalit pinagsisisihan ko na naman ang pagkakamali ko sa pamilya ko. Sa ngayon po nahihirapan ako dahil sa tuwing naaalala ng misis ko yung pagkakamali ko lagi po kaming nag-aaway. Lahat naman ay ginagawa ko pero hindi niya talaga makalimutan yung mga nangyari. Sobrang nasusuklam daw siya sa akin. Ano po ba ang dapat kong gawin?

Dear Gino,

Kung minsan, alam na nating kasalanan ay ginagawa pa rin natin. Pero dapat nating tandaan na bawat pagkakasala ay may katumbas na consequence sa buhay. Nakasugat ka ng damdamin kaya medyo kailangan ang pagtitiyaga at paghihintay para maghilom ang sugat. Dagdagan mo pa ang panunuyo at huwag magsawang humingi ng tawad. Naniniwala ako na walang sugat na hindi pinaghihilom ng panahon.

Sumasaiyo,

Vanezza