Gustong magduda sa misis

Dear Vanezza,

Please call me Junrie, may asawa at 41 yrs old na. Nag-asawa ako sa edad na 35 at isa lang ang anak naming mag-asawa. Bata sa akin ng 12 years ang misis ko. Pero may nababalitaan ako mula mismo sa mga kaanak ko na pinagtataksilan niya ako. Naguguluhan ako at hindi ko alam kung maniniwala ako o hindi. Kasi ay regular ang aming chat ng misis ko. Madalas ay tinatawagan ako sa cell phone at very sweet siya sa akin. Ito’y bagay na hindi magagawa ng babaeng nagtataksil. Parang masisira tuloy ang ulo ko sa mga balitang nang- gagaling mismo sa aking pamilya sa Pilipinas. Ano ang gagawin ko?

Dear Junrie,

May kasabihan na walang bait sa sarili ang na- niniwala sa sabi-sabi. Pero hindi kita masisisi kung masyado kang maguluhan dahil mismong pamilya mo ang nagkukuwento. Gayunman, maraming sitwasyon na dahil sa pagkamakasarili ng mga kaanak, nagagawa nilang siraan ang asawa mismo ng kanilang kapamilya. Kaya bago ka maniwala ay gumawa ka ng sariling imbestigasyon. Kung may pagkakataon kang umuwi ng Pilipinas, mag- usap kayong mag-asawa at tiyak kong sa kanyang mga salita ay mababasa mo kung nagtataksil nga siya sa iyo.

Sumasaiyo, Vanezza