‘Torn between two lovers’

Dear Vanezza,

Tawagin mo na lang akong Celine. Noong araw, may naging boyfriend ako. Akala ko ay siya na dahil abot-langit ang pag-ibig ko sa kanya. Sa hindi ko malamang dahilan ay naglaho siya. Naputol ang aming ugnayan nang wala akong alam na dahilan. ‘Yun pala nag-abroad siya sa Canada at nabalitaan ko lang sa isang kaibigan na kakilala siya. Umibig ako sa iba dahil may 5 years na mula ng umalis siya. Kami ngayon ay nakatakda nang ikasal. Pinipilit ko pa ring limutin ang lalaking aking minahal. Bigla ko na lamang siyang natagpuan sa Facebook at nagkaugnayan kaming muli Nakikipagbalikan siya kaya gulung-gulo ang isip ko. Ano ang gagawin ko?

Dear Celine,

Kung tatanggapin mo siyang muli, maraming masasaktan. Ang bf mo ngayon at ang kanyang mga kaanak na malamang magalit sa iyo. Liligaya ka ba sa lalaking bigla na lamang maglalaho nang hindi mo nalalaman at biglang magbabalik na parang walang nangyari? Timbangin mo ang mga sikumstansiya at diyan ka gumawa ng matalinong pasya. Ikaw lang din ang makakapagdesisyon sa bandang huli.

Sumasaiyo,

Vanezza