Pumatol sa matanda

Dear Vanezza,

Lumaki po ako sa pamilyang mahirap. Wala na po akong tatay. May edad na ngayon ang nanay ko at isa lang siyang labandera. High school lang ang natapos ko at hindi na kayang mag-aral pa sa college. Dahil sa hirap, napilitan akong makipagrelasyon sa isang matandang negosyante na may asawa at 59 years old na. Kahit halos mandiri ako sa pakikipagrelasyon sa kanya, pinipilit ko na lang ang sarili ko dahil sa kanya nanggagaling ang kinabubuhay naming mag-ina. Itinira niya ako at nanay ko sa isang apartment. Mayroon akong tunay na bf na mahal na mahal ko. Mahirap din siya at nauunawaan niya ang nagawa ko. Alam kong mali pero kapit sa patalim ang nangyayari sa buhay ko. Ano ang ang gagawin ko? - Haney

Dear Haney,

May iba namang paraan para mabuhay nang disente basta’t hindi ka lang maghahangad ng sobrang luho sa katawan. Puwede ka rin namang mag-working student para makapagpatuloy ka sa kolehiyo at kahit paano’y kumita. Maaari ka ring magbukas ng kahit maliit na tindahan o pumasok sa simpleng negosyong makakayanan mo. Hindi ka dapat magpagapos sa ganyang sitwasyon habambuhay.

Sumasaiyo,

Vanezza