Unpredictable ang pag-ibig

Dear Vanezza,

Ako po si Gio. Nagkaroon po ako ng gf sa school namin. Pero nagtagal lang kami ng isang buwan. Sabi niya kalimutan ko na siya. Nang tanungin ko kung bakit, ayaw niyang magsalita. Hanggang sa nakita ko siyang may kasabay kumain sa canteen. Estudyante rin at guwapo. Parang dinurog ang puso ko. Na-confirm ko na bf niya na pala yun. Hiyang-hiya ako lalo na sa mga barkada ko dahil alam nila na kami tapos makikita nila na may kasama siyang iba. Mahal na mahal ko siya. Ano ang gagawin ko?

Dear Gio,

Wala ka ng magagawa kung may iba na siyang minamahal. Hindi pa kayo kasal o engaged kaya wala kang lubos na karapatan sa kanya. Ipagpasa­lamat mo na lang dahil nangyari yan habang kayo’y magkasintahan pa lang. Ganyan talaga sa pag-ibig, unpredictable. Ngayon kayo, bukas may iba na ang mahal mo. But keep on living. Bata ka pa at makakakita pa ng higit sa kanya. Isang babaeng magmamahal din sa’yo nang tunay at tapat.

Sumasaiyo,

Vanezza