Yna, ipinaglaban na ang pagmamahalan nila ni Angelo
MANILA, Philippines – Matapos paulit-ulit na magsakripisyo para sa kaligayahan ng iba, nagpakatotoo na sa kanyang sarili si Yna (Kathryn Bernardo) at piniling ipaglaban ang kanilang pagmamahalan ni Angelo (Daniel Padilla) sa top-rating teleseryeng Pangako Sa ‘Yo.
Matapos ihayag ang kanyang totoong nararamdaman kay Angelo, tuluyan na rin siyang pinakawalan ni David (Diego Loyzaga) na ngayon ay lalong lumalala na ang kalagayan.
Ngunit sa kabila ng pagpapakatotoo sa sarili, kailangang harapin ni Yna si Nanay Belen (Amy Austria) na nananatiling tutol sa relasyon nina Yna at Angelo.
Samantala, determinado si Claudia na mawala sa landas niya sina Yna at Amor (Jodi Sta. Maria), lalo na ngayong alam na niyang si Yna si Maria Amor, ang anak nina Amor at Eduardo (Ian Veneracion).
Hanggang kailan mapapaniwala ni Claudia ang kanyang pamilya na hindi pa rin niya naaalala ang kanyang nakaraan? Magtagumpay kaya siya sa mga plano niya? Magawa pa kaya niyang paghiwalayin sina Yna at Angelo gayong desidido na ang mga itong magpakatotoo sa kanilang nararamdaman?
Sa mga umiinit na tagpo sa Pangako Sa ‘Yo, mas umiinit din ang suporta ng mga manonood dito. Kagabi (Jan 20), pumalo ito sa national TV rating na 30.5%.
Huwag palampasin ang mga tagpo sa classic love story ng mga Pilipino, Pangako Sa ’Yo, gabi-gabi pagkatapos ng FPJ’s Ang Probinsyano sa ABS-CBN Primetime Bida.
- Latest
