Enrique lalong nababaon sa kaka-sorry!
Simula noong humarap si Enrique Gil sa media noong press conference ng kanyang pelikulang Everyday I Love You, wala na yata kaming nakita kung ‘di nagsisisi siya sa nangyaring controversy sa kanya sa eroplano kamakailan, at paulit-ulit siyang nagso-sorry dahil sa nangyaring iyon.
Nakapag-sorry na naman siya pagkatapos noon, palagay naming ay tama na iyon. Ang naging controversy lang naman pagkatapos noon ay ang reaksyon ng ilan niyang fans sa mga artistang nagalit sa kanya dahil sa insidente.
Bina-bash ng kanyang fans ang mga iyon, na natural magalit din lalo.
Pero hindi naman si Enrique iyon eh kundi ang fans niya.
Hindi pa nga tayo nakakasiguro kung ang mga bashers na iyon ay talagang mga fans nga ni Enrique o mga taong ang gusto lang talaga ay siraan siya.
Palagay din namin ay nagkaroon ng pagkakamali sa ginawang damage control. Siguro nga ang layunin nila ay iligtas si Enrique dahil siya ay mas hot property ng kumpanya, pero sa kanilang naging aksiyon ay naging underdog naman ang mga nakalaban niya at nakakuha ng simpatiya ng publiko.
Ngayon sinisisi pa si Enrique dahil sa nangyari sa kanilang career.
Sa damage control, ang dapat sana ay iwasan nang mapag-usapan pa ang naging problema. Mas mabilis na makalimutan iyan ng mga tao, mas mabuti.
Kaya iyang paulit-ulit na pagsisisi sa nangyaring iyon ay hindi na sana dapat pang isapubliko.
Habang binabanggit iyan, lalo lang naaalala ng mga tao ang hindi magandang ginawa ni Enrique sa eroplano habang papunta sa London. Kaya nga sinasabi naming mali ang damage control.
Unfair din iyon at hindi nakakatulong kay Enrique. Dapat sana sa halip na iyon ang ginawa nila, pag-usapan na lang kung ano nga ba ang kanyang ipinakita sa pelikula.
Sabihin kung magaling ba siyang actor talaga. Dapat iniiwasan ang mga ganoong controversy.
Pero ang pag-iwas sa mga ganyang controversy ay hindi ang pagsasabing “bawal magtanong” ng tungkol doon.
Dapat kung may controversy, sagutin nang minsanan lamang, pero dapat credible ang sagot.
Megan hindi na raw gaanong pinag-interesan sa MariMar
Palagay din namin, unfair din naman kay Megan Young iyong sinasabi nilang mukhang walang nangyayari sa paglabas niya bilang si MariMar.
Mahusay naman si Megan, at saka ang totoo, wala namang kahit na sinong gumaya kay Marimar na ang ratings ay kasing taas noong original na Mexican series na ginawa ni Thalia.
Noong panahong palabas iyon, lahat ng mga tao nakatututok sa MariMar. Parang AlDub iyan noong araw. Lahat naman ng sumunod hindi umabot doon eh. Mahirap mong pantayan ang original, lalo na’t remake ka na lang na ibig sabihin alam na ng mga tao ang kuwento.
Hindi lang naman Marimar eh. Ginaya rin naman iyong Maria la del Barrio, hindi rin naman kasing taas ang ratings noong original na Mexican drama. Siguro nga nasagad na ang interest ng mga tao nang unang ilabas ng RPN 9 iyang MariMar. Iyon ang nagsimula ng Mexican drama trend sa Pilipinas. Iyon din ang nagbukas para sa posibilidad ng mga nauso ring Koreanovela.
Unfair na nagsabing walang nangyari kay Megan Young.
Palagay namin kung iyan si Megan ay mabibigyan ng isang makatuturang drama na original, baka mas malakas pa ang dating niyan.
Siguro nga ang naisip nila, iyong kagandahan ni Megan at iyong kanyang popularidad bilang Miss World winner ang siyang makapagdala nang husto sa ikalawang remake na ng MariMar, pero hindi nila naisip na baka naman sobra na iyong tatlong ulit mong susubaybayan ang iisang istorya lang naman.
- Latest
