Bagong album ni Sarah, kakaiba ang hagod pang world class ang dating

Matagal nang singer si Sarah Geronimo, at sikat siya talaga pero hindi kami nagkaroon ng pagkakataong mapakinggan ang kanyang mga CD kagaya sa ginagawa namin sa ibang mga paborito naming singer. May ilang pagkakataon pero hindi nga matagalan.

Noong isang araw, may isa kaming kaibigan na nagsabi sa aming pakinggan ang isang CD, eh ‘di sige. Iyon pala ay iyong album ni Sarah G na Perfectly Imperfect. Honestly, iyon ang kauna-unahang pagkakataon na pinakinggan namin siya nang seryoso.

Pero pinagtatalunan nga namin pagkatapos, hindi kasi ganoon ang mga dating kanta ni Sarah. Ngayon, diyan sa CD na iyan, maririnig mo ang kanyang hagod. Maririnig mo talagang musika. Iyong mga dating kanta ni Sarah, masasabi mong pop lang, ibig sabihin komersiyal ang pagkakagawa. Kung ano nga siguro ang iniisip nilang magiging hit, iyon ang ipinagagawa sa kanya. Iyon naman kasi ang inaasahan sa kanya eh, iyong gagawa siya ng isang hit na CD. Pero rito sa bago niyang album, iba ang dating.

Natawag ang aming pansin noong kantang Kilometro. Komersiyal pa rin ang kanta, pero iba ang hagod. Mas matindi pa iyong kanta niyang Bulletproof. Iba talaga ang dating. Pagkatapos marinig ang album na ‘yan, nasabi nga namin na world class pala si Sarah. Noon kasi ang tingin namin sa kanya, para bang iyong karaniwang singer na nanalo sa isang singing contest, na-build up, nagkaroon ng pangalan, gumawa ng pelikula at itinuring na isang malaking star. Kumikita naman kasi ang mga pelikula niya. Lately ay nanalo pa siya ng isang ac­ting award.

Pero itong bago niyang CD, iba talaga ang dating. Matapos naming marinig iyon, bumili na kami ng sarili naming kopya ng CD. Honestly, ngayon lang kami bumili ng CD ni Sarah.

Kathniel sinisiraan para humina ang hatak

Totoo ba iyong suspetsa nila na may mga tao raw na gustong sirain iyong Kathniel, ibig sabihin ay iyong tambalan nina Daniel Padilla at Kathryn Bernardo? Malakas talaga ang team up nila, and individually, malakas din naman sila bilang mga solo star. Dahil diyan, may mga tao nga raw na natatakot na baka maging masyado silang malakas at kung mangyayari iyon, maaari na silang magdikta ng kung ano ang gusto nila.

Dahil doon, kaya raw may naninira na sa kanila. Sinubukan nga naman na hanapan sila ng kakumpitensiya. Noong hindi naman umubra ang mga sinasabing makakalaban nila, ngayon sinisira nila ang team up “from within”. Iyan daw ang isa sa mga dahilan kung bakit lumabas ang kontrobersiyal na audio recording kung saan parang binabale-wala ni Daniel si Kathryn. Parang ang gusto nilang mangyari, mahati muna ang lakas ng fans ng dalawa.

Uubra ba naman?