Nakakulong na Puso sa Magpakailanman!

MANILA, Philippines - Kaya mo bang aralin kung paano mahalin ang isang tao?

Masuwerte si Andrea sa buhay niya. Alam niya kung ano ang gagawin niya pagkatapos mag-aral: humanap ng magandang trabaho, at magpakasal sa childhood sweetheart niyang si Rowell. Pero maiiba ang kanyang kapalaran nang, isang gabi, ay pagtangkaan siyang halayin ng kanyang magiging tiyuhin—

At nang mapatay ito ni Teddy, ang kaibigan niyang pilit nanliligaw, sa isang iglap, mababago ang kinabukasan ni Andrea. Pagtatakpan niya ang ginawa ni Teddy na pagtatanggol sa kanya. Aakuin niya ang krimeng nangyari. Pero walang maniniwala sa kanya. At magiging tali na sa isa’t isa ang mga buhay nina Andrea at Teddy.

Ngayon, hindi lang kalayaan niya ang maaaring mawala sa kanya; maging ang puso niya ay maaa­ring makulong, sa isang pagsasama na hindi niya gusto—sa lalaking hindi niya mahal.

Nakakulong na Puso ay pina­ngungunahan nina Bela Padilla at Dion Ignacio. Kasama rin sina Neil Ryan Sese, Pancho Magno, Lovely Rivero, Frencheska Farr, Joy Velasco, Dexter Doria, at Ernie Garcia.

Mula sa direksyon ni Argel Joseph, sa panulat ni Jason John Lim at sa pananaliksik nina Rodney Junio at Cynthia delos Santos, alamin ang kuwento ng Nakakulong na Puso sa Magpakailanman ngayong Sabado ng gabi pagkatapos ng Vampire ang Daddy Ko sa GMA 7.