‘Singsing’ (Part 12)
“’YAN ang dahilan Ram, kaya sinabi ko sa’yo na sa’yo na lamang ang singsing. Ayaw ko nang ingatan pa ang bagay na magpapaalala sa kataksilan. Habang nakikita ko ang singsing, lalong sumasakit ang dibdib ko,” sabi ni Cora makaraang pahirin ng tissue paper ang luha.
“Nauunawaan na kita. Sige tatanggapin ko ang singsing kung yun lamang ang makagagaan sa kalooban mo. Ibigay mo sa akin ang singsing,” sabi ko.
“Salamat Ram”, sabi ni Cora at tumayo para kunin ang singsing na ipinatong sa ibabaw ng cabinet.
Ibinigay sa akin.
“Ikaw na ang bahala sa singsing na ‘yan, Ram.”
“Oo ako na ang mag-iisip ng paraan tungkol sa kahihinatnan nito.”
“Salamat uli.”
“So ano na ang plano mo ngayon, Cora.”
“Pagtutuunan ko ang aking negosyo sa probinsiya.”
“Hindi ka na mag-aabroad?”
“Hindi na.”
“Sana malimutan mo na ang ginawa ng taksil na lalaki.”
“Oo gagawin ko.”
“Magpapaalam na ako, Cora.”
“Kapag may oras ka, dalawin mo ako rito, Ram.”
Tumango ako.
Itutuloy
- Latest
