‘Kandila’

(LAST PART)

HINDI ako makapaniwala sa nakita nang inspeksiyunin ko ang itim na kandila sa pinagtataguan nito—natunaw na ito.

Saka ko naalala ang sinabi ni Lola Feliza na darating daw ang panahon na matutunaw ang kandila. Mangyayari raw iyon at hindi ko inaasahan. Pero bago raw mangyari iyon ay marami na itong magagandang pangyayari na nagawa sa akin.

Nagkatotoo ang mga sinabi ni Lola sapagkat lahat nang mga magagandang bagay ay nangyari na sa akin. Maraming suwerte ang dumapo sa akin.

Bukod sa nanalo ako sa sweepstakes at napabilang sa top 10 ng Acounting board exams, nakapag-asawa ako ng isang babaing mabait, malambing at maganda. Mayroon kaming apat na anak na pawang matatalino. Maayos ang buhay namin.

Lahat nang iyon ay dahil sa suwerteng hatid ng kandila.

Tama si Lola. Kapag iningatan ang isang bagay, babalik iyon at maraming suwerte ang kakamtin.