NGAYON na lang uli nakauwi ng Pinas si Jefferson. Matagal siyang hindi umuwi mula sa pagtatrabaho sa New Zealand. Mga pitong taon siya roon. Taga-katay ng usa ang trabaho niya sa New Zealand. Bago siya naging butcher ng usa, dati naman siyang trabahador sa isang poultry sa United Arab Emirates. Naka-sampung taon din siya sa UAE bago nagpasyang lumipat sa ibang trabaho. Gusto naman niya ay sa ibang bansa.
Nag-aplay siya sa New Zealand kasama ang isang kasamahan. Nakita nila ang ads sa online. Natanggap sila. Maayos ang pasuweldo roon. Malayo lang sa city ang kanilang trabaho pero maganda ang tirahan nila. Sagana rin sa pagkain. Hindi siyan nakadama ng lungkot dahil may kakilala naman siya na dating kasamahan.
Ngayong umuwi siya sa Pinas at magtatagal ng isang buwan dito, mayroon siyang hahanaping babae na nakilala niya bago nagtungo sa NZ.
Si Mayang!
Nagtungo sa probinsiya si Jefferson para hanapin si Mayang. Habang nasa bus, nagdarasal siya na sana ay naroon pa si Mayang! Gusto niyang makita at malaman ang nangyari kay Mayang. (Itutuloy)