ISANG lalaki sa Virginia, U.S.A. ang nakapagtala ng world record dahil sa libu-libo niyang koleksiyon ng Funko Pop.
Kinumpirma ng records keeping organization na Guinness World Records na si Paul Scardino ang pinakabagong may hawak ng world record title na “Largest Collection of Funko Pop! Figurines”. Ito ay matapos siyang makapagkolekta ng mga ito na umabot na sa 8,002 pieces.
Ang Funko Pop ay isang uri ng mga collectible toys na gawa ng kompanyang Funko. Kilala ang mga Funko Pop figures sa kanilang distinct na disenyo: malalaki ang ulo na may simpleng detalye ng mukha at maliit na katawan. Ang mga ito ay kadalasang base sa mga karakter mula sa pelikula, TV shows, video games at komiks.
Dahil sa pagiging collectible, marami ang nagkokolekta ng iba’t ibang bersyon ng mga Funko Pop na inilalabas, lalo na ang mga limited edition.
Ayon kay Paul, ang pagkokolekta niya ng Funko Pop ay nakatutulong sa kanyang mental health. Dagdag pa niya, nagiging daan din ito para siya magkaroon ng social life sa pamamagitan ng pakikihalubilo sa iba pang Funko Pop collectors.
Si Paul Scardino at ang libong koleksiyon niya ng Funko Pop figurines.