Unang kabanata nagtapos na, pero may kasunod pa!
Ayan na nga mukhang nagtapos na ang unang kabanata o season sa mala-teleseryeng kaganapan sa pulitika sa bansa.
Nagkaroon ng linaw o kasagutan sa mga katanungan mula sa pagsusumite ng certificate of candidacy (COC) hanggang kahapon na deadline ng substitution.
Hindi nangyari ang mga unang inaasahan na maglalaban sa pagka-bise presidente sina Pangulong Rodrigo Duterte at anak na si Davao City Mayor Sara Duterte-Carpio.
Hindi rin personal na nagtungo sa tanggapan ng Comelec ang Pangulo imbes ang kanyang abogado ang nagsumite ng kanyang kandidatura.
Hindi rin sa ilalim ng PDP-Laban tatakbo ang Pangulo kundi sa ilalim ng Pederalismo ng Dugong Dakilang Samahan kahalili ng isang Mona Liza Visorde.
Sa nasabing partido rin nagharap ng COC sa ilalim ng substitution si Senador Bong Go na ngayon nga ay tatakbo ring presidente.
Iniwasan nila ang kumplikasyon sa gusot sa PDP-Laban.
Bukod kay Pangulong Digong, marami pang personalidad ang humabol sa paghahain ng kandidatura sa ilalim ng substitution.
Isingit ko lang kabilang dyan si dating PNP chief Gen. Guillermo Eleazar. Good luck, sir!
So, nasagot na ang ilang mga katanungan.
Pero may susunod na mga kabanata pa tayong hinihintay. Kabilang nga rito eh kung madedesisyunan ng maaga ng Comelec ang mga inihain sa kanilang mga petisyon, at ang sinusubaybayan nga ay ang iniharap na petisyon laban kay dating Senador Bongbong Marcos.
Bukod dyan, ay ang magiging opisyal na listahan ng mga kandidato para sa 2022 elections.
Sinasabing mahigit daw sa kalahati sa nagsumite ng COC sa pagka-pangulo ang mawawalis sa listahan.
Pero parang alam na rin naman kung sinu-sino ang maglalaban-laban.
Ang kabanatang ito marahil ay hanggang sa pagsapit na mismo ng halalan.
Kung ano ang mga pwedeng mangyari , yan ang patuloy pang -aabangan, sa pagpapatuloy ng tele-drama at mala-aksiyong halalan.
- Latest
