NAG-VIRAL sa Facebook ang litrato ng isang isda na may mga ngipin na akala mo’y sa tao. Ang isda ay nahuli sa North Carolina. Ang nakahuli sa isda ay si Nathan Martin.
Matapos mahuli ni Martin ang isda na tinatawag na sheepshead, kinuhanan niya ito ng litrato at agad ipinost sa Facebook. Mayroon pa siyang kuha na naka-pose katabi ang nahuling sheepshead fish.
Agad kumalat ang litrato. Marami ang hindi makapaniwala sapagkat kakaiba ang ngipin ng isda na kahalintulad sa tao.
Ang hugis at porma ng ngipin ng isda ay walang ipinagkaiba sa tao kaya marami ang nakapansin at nag-share ng litrato nito.
Bukod sa mga nagkomento sa pagkakapareho nito sa ngipin ng tao, may mga nagsabi rin na nakakatakot raw ang itsura ng isda dahil sa kakaibang ngipin nito.
Hindi naman naging hadlang ang itsura ng isda para kainin ito ni Martin, na nagsabing masarap daw ito kaya sulit ang pagkakabingwit niya rito.