HINDI akalain ng isang lalaki sa Colorado na sa kanyang pagja-jogging ay makakasagupa niya ang isang mountain lion at makakaligtas siya sa pamamagitan ng pagsakal dito.
Mag-isang tinatakbo ng hindi na kinilalang lalaki ang running trail sa Colorado noong nakaraang Lunes nang may narinig siyang ungol sa lugar.
Dahil nangamba siya sa ungol, naisipan ng lalaking umatras at bumalik na lang sa bahay. Ngunit huli na dahil bigla siyang dinamba ng leon.
Ayon sa wildlife officials, sinakmal ng leon ang mukha ng lalaki. Pero malakas ang loob ng lalaki. lumaban siya at buong higpit na sinakal ang mabangis na hayop hanggang mamatay.
Isinugod sa ospital ang lalaki at nakaligtas sa kamatayan. Nagpapagaling na siya sa mga sugat na tinamo sa mukha. Sa ngayon ay hindi pa siya nagbibigay ng pahayag sa nangyari.
Ayon sa mga eksperto, tama ang ginawa ng lalaki na paglaban nang walang puknat sa leon. Ito raw lamang umano ang tanging paraan para makaligtas sa pagsalakay ng mountain lion.
Ayon naman sa wild officials, maaring nagambala ang leon sa ingay ng pagtakbo ng lalaki kaya sinalakay ito.