Pero bakit kaya magpahanggang ngayon
bansang naghihirap hindi makaahon,
ang sanhi marahil ating matuturol
ay nasa mga taong wari’y isip-mamon!
Marami sa ating mga kababayan
walang iniisip kundi karangyaan;
sa malaki’t munti na mga tahanan
si Asyong Aksaya ang laging karamay!
Kaya patuloy pang tayo ay hikahos
pagka’t mamamaya’y waring nakagapos
sa buhay na dukha at buhay na kapos
ayaw umasenso’t sa dangal ay takot!