Kamakalawa sinalakay ng mga tauhan ng Quezon City Police District-Anti Illegal Drugs (QCPD- DAID) ang isang apartelle sa Cubao malapit sa isang terminal ng bus sa Brgy. Socorro sa lungsod.
Labing-isa katao ang naaresto dito na naaktuhang gumagamit ng ilegal na droga.
Eto pa ang nakakaalarma, komo nga raw malapit sa isang bus terminal, aba’y karamihan pala sa parokyano dito eh mga driver at konduktor. Kaya nga raw ayon sa nagsumbong labis itong nakakabahala dahil nakasalalay dito ang kaligtasan ng mga pasahero .
Nag-ugat ang raid makaraang makatanggap ng sumbong ang mga awtoridad tungkol sa mga transaksyon ng ilegal na droga sa lugar kaya nga dalawang linggo itong minanmanan bago nga nakumpirma ang operasyon kung saan isinagawa ang pagsalakay.
Ayun nga, nang pasukin ang lugar, naaktuhan pa ang mga nadakip na gumagamit ng shabu.
Dapat talaga na maging mahigpit ang pagmomonitor sa mga ganitong lugar na pinaglulunggaan ng mga transaksyon sa ilegal na droga. Kung saan-saang lugar na lang nagsusulputan ang mga ito.
Kabi-kabila ang operasyon hindi lamang ng pulisya kundi maging ng NBI at iba pang ahensya laban sa ilegal na droga, pero talagang masasabing laganap ang operasyon ng mga ito.
Kamakailan din lang nagsagawa ng serye ng operasyon ang NBI sa Pasay, Las Pinas at Muntinlupa kung saan dalawang kawani ng BuCor at dalawang sibilyan ang natumbog . Ilang kilo ng shabu ang nasamsam sa mga isinagawang operasyon.
Sa ngayon patluy pa ang follow-up operation ng NBI patungkol dito, lulu na’t nakuha sa isa sa nadakip nag mga contact number , pangolin at lugar kung saan niya ibinabagsak ang nasamsam na kilo-kilo ng shabu.
Sa puntong ito, kailangan ang matalim at malalim na pagmamatyag lalu na sa lebel ng barangay na siyang unang maaaring makamonitor sa mga kilos at galaw sa kanilang nasasakupan.