MARAMING mapa-nganib na tulay sa mundo pero wala nang hihigit pa sa Kuandinsky Bridge na nasa Trans-Baikal Region sa Russia. Ang tulay na ito umano ang pinakamapanganib na tulay sa buong mundo sapagkat munting pagkakamali ng sinumang nagdadaan dito ay mahuhulog sa nagyeyelong Vitim River.
Bihirang tao ang gumagamit sa tulay sapagkat lubhang madulas ang mga lumang kahoy na nagsisilbing railway. Kapag nadulas ay tiyak na mahuhulog sa ilog.
May habang 570 meters ang tulay at may lapad na dalawang metro. Kasyahan lamang ang isang sasakyan. Walang harang ang mag-kabilang gilid ng tulay kaya kapag nagkamali ang drayber, swak sa nagyeyelong ilog. Kinakalawang na ang structure ng tulay sapagkat buong taon ay nababalutan ito ng yelo.
Sa kabila naman na mapanganib ang pagdaan sa tulay, marami pa ring drayber ang nangangahas tumawid na para bang isang challenge iyon sa kanila. Kapag nakalampas sa tulay ang drayber, nakapagmamalaki siya sapagkat natawid ang pinakamapanganib ng tulay sa mundo.