Sa mga lansanga’y nagkalat ang bisyo
Ang sugal, babae, alak at ang opyo
Ang mga paninda’y mataas ang presyo
at ang mga ganid nagkalat sa kanto!
O, ano pa nga’t lahat na ng sama
tila naipon na sa mahal ‘tang bansa;
mga pulitikong dapat halimbawa
siya pang kapural sa gawaing lisya!
Kaya isa na lang ang tanging pag-asa
nitong mamamayang dahop sa ligaya;
kung mamarapatin ng poong lumikha
ang lahat ng taksil lunurin sa baha!
Baha nga ang tanging panlunas sa lahat
ng dusa ng ating bansang nagsasalat;
katulad ng noon sa mundo’y naganap
baha nang maglaho’y biglang nagliwanag!