Bumoto nang buong puso!

Napakahalaga sa’kin, bumoto nang buong puso

Kasi’y naranasan ko na yaong gobyernong palalo

Noo’y lagim at takot ang namahay sa aking puso,

Dahil noon ay balakyot ang sa trono’y nakaupo.

Nang kanilang mapatahan mga taong lumalaban,

Pahapyaw na pinaboto

kaming mga mamamayan

Plebisito mayrong dal’wang malalim na katanungan,

Oo’t, hindi man ang sagot, oo ang kinalabasan.

Noon puso ko’y nanlumo sa duhaging naramdaman,

Sa hungkag na pag-ibig ng palalong pamahalaan

Mata ko ma’y nakapikit, nakikita sa isipan,

Pagsiil ng namumuno sa nasain kong maghalal.

Kaya ngayong narito na sa lupaing kumandili,

Na kung saan mayroong laya na bumoto at pumili

Bago pa man ang eleksiyon, kandidato’y sinusuri,

Nang sa araw ng halalan, ang pluma ko’y di mangimi.

Ang una kong rekisito sa akin ngang iboboto

Ay yaong pinili ng Dios na sa bayan magserbisyo

Yaong arok na gobyerno’y ginawa para sa tao,

At tao’y hindi nilalang para sa kanyang gobyerno.

Iboboto ko yung hindi nanlibak sa katunggali

Yaong katotohanan ang sa labi’y namumutawi

Yung kandidatong di gawi ang gawang pagkukunwari,

Siyang hindi naman ganap, nguni’t malinis ang budhi.

Akin din ngang sinusuri ang naitalang listahan,

Na ginawa ng pulitiko sa mahal na inang bayan

Ang pag-aari baga niya, kanya na bago nahalal?

O kung siya ay nagnakaw, mayroon bang katibayan?

Hindi ko rin maihalal kandidatong walang habag,

Yung tingin sa mahihirap ay sa lipunan pabigat,

Sanggol sa sinapupunan ay payag ding ipalaglag,

Sa ngalan ng hindi handa, pasanin lang at bagabag.

Nais ko ay kandidatong di nagtatago sa dilim,

Yung pag-ibig sa bayan niya ay taos at mataimtim

Yung hindi bihag ng sugal, at laman niya’y nasusupil

Para bagang isang inang ang pakpak ay naglililim!

Kasi natuto na ako doon sa may makikinang,   

Buwis ng baya’y ninakaw, sa iba ipinangalan

Gusto kasing maging tanyag sa buong sandaigdigan,

Naging bingi sa hinaing ng kapos niyang kababayan.

Kaya ako’y nagagalak, nuong napalitan sila

Nguni’t laking pagtataka, bakit naihahalal pa?

Bakit wala na bang iba na hahamon sa kanila,

Kandidatong walang dumi at malinis ang konsensiya?

Kaya ako ay boboto ng mayro’ng katalinuhan

Pagka’t ako ay bahagi sa paghubog ng lipunan

Dahil aking karapatan nagmula sa pinuhunang…

dugo ng mga bayaning nagbuwis ng kanilang buhay! —Bella Rosa