INISA-ISA ni Abby ang plano niya sa kanyang Lola Lourdes. Katatapos lang niya ng high school at nakapasa siya sa entrance test ng University of Santo Tomas.
“Pipilitin kong tapusin ang B.S. Zoology nang may karangalan.”
“Pagkatapos?” nakangiting tanong ni Lola Lourdes.
“Kukuha ako ng Medicine.”
“Pagkatapos?”
“I’ll take the board exam.”
“Pagkatapos?”
“Magpapakadalubhasa ako sa pagpapaganda, Cosmetic Dermatology.”
“Pagkatapos?”
“Magtatrabaho muna ako sa clinic ng sikat na doktor na mga artista ang pinapaganda.”
“Pagkatapos?”
“Magtatayo ako ng sariling clinic.”
“Pagkatapos?”
“Mag-aasawa ng guwapo para magkaanak ng magaganda at guwapo.”
“Pagkatapos?”
“Maglilibot sa buong mundo.”
“Pagkatapos?”
“Magre-retire at mag-enjoy sa aking perang naipon.”
“Pagkatapos?”
“Mamamatay at magbi-beauty rest sa langit.”
“Apo, gaano ka kasigurado na sa langit ka pupunta, kahit minsan ay hindi mo isinama sa iyong plano si Jesus?”