Dahil ang daigdig matanda na ngayon
Kaya nagbago na lakad ng panahon;
Pati mga tao saanman naroon
Magandang ugali ay naging simaron!
Sa lahat ng dako ng aring daigdig
Mga taong banal ay naging masungit;
Walang anu-ano ating namamasid
Nag-aaway-away ang magkakapatid!
Mga lahi’t bansa’y hindi magkasundo
Sa hangad makuha ang poder at ginto;
Magandang prinsipyo noon ay pangako
Ngayon ay wala na sa isip at puso!
At dito sa ating tahimik na bansa
May gustong sumakmal na bansang masama;
Dahil sa maraming armas na pandigma
Kaliitan natin binabalewala!