Ang nagdaang taon kung pagbabalikan
Malungkot na buhay ating naranasan;
Di ito katulad ng nagdaang mga araw
Na laging masaya walang kalungkutan!
Noo’y mga bansa ang nagsasagupa
Bagama’t mahirap dahil sa may digma
Doo’y nagagapi ang mga banyaga
May mga bayaning sa baya’y dakila!
Sa ngayo’y masdan mo itong ating bayan
Ang ama at anak ay nagpapatayan;
Batas at hustisya ay niyuyurakan
Nagkalat sa bansa ang makasalanan!
Sa lahat ng panig magulong-magulo
Kasi’y balewala ang ating gobyerno;
Sa bayan at lunsod may mga bandido
Masayang panahon ay wala na rito!