Uok (39)

SUMAKAY sila ng dyipni na biyaheng Project 6. Unang pumanhik si Gab. Nasa likuran si Drew. Maganda talaga ang katawan ni Gab. Hakab ang jeans sa katawan. Halatang walang bilbil. Flat ang puson. Alam niya dahil ilang beses na rin niyang nakita si Gab habang naliligo sa batalan. Mayroon pa nga siyang photos nito sa kanyang iPhone. Napangiti si Drew, sino ang mag-aakala na ang babaing lihim niyang pinanonood sa paliligo ay katabi niya sa jeepney.

“Saan ka umuuwi Gab?” tanong niya habang nakatingin dito.

“Sa may UP. Sa C. P. Garcia.’’

“Ah.’’

“Ikaw saan ba sa inyo?” tanong sa kanya.

“Sa may SM-North. Sa likod ng mall.’’

“A dun sa may simbahan?”

“Oo. Alam mo yun?’’

“Nakarating na ako. May friend ako dati roon pero wala na yung friend ko.”

“Anong wala? Nawala?”

“Parang ganun. Hindi na nakita.’’

“Babae o lalaki?”

“Babae.”

“Saan nawala?”

“Sa Bulacan.’’

“Matagal na?”

“Mga three years na.’’

“Ano kaya ang dahilan at nawala?”

Hindi sumagot si Gab.

Maya-maya, dumudukot ito ng pera sa bulsa. Pamasahe.

“Ako na,” sabi ni Drew.

“May coins ako.  Magkano ba hanggang dun?”

“Ako na. Lalaki dapat ang nagbabayad.”

“Sino naman ang nagsabi na lalaki dapat ang magbayad?’’

“Basta. Yun ang alam ko.’’

“Mali yun. Pare-pareho tayo, pantay-pantay.’’

“Basta ako magbabayad.’’

Dinukot ni Drew ang pitaka. Kumuha ng P50. Inabot sa drayber.

“Dalawa, mama. Sa may Veterans ang baba.’’

Pinakiramdaman ni Drew si Gab. Mukha ngang may pagkaaktibista ito. Laging may katwiran.

“Maganda ang kuwintas mo. Mamahalin daw yun. Parang Saudi gold,” sabi niya pagka­raan.

“Saudi gold nga yun, 18-k.’’

“Mabuti at nakita ng Tiyu-hin ko. Nakabaon na raw sa lupa o putik malapit sa batalan.’’

“Salamat sa tiyuhin mo.’’

“Hindi mo ba kilala maski   ang tiyuhin ko. Siya ang may-ari ng bahay na katabi ng bahay n’yo.’’

“Hindi ko kilala. Dalawang beses pa lang ako napupunta roon.’’

“Ako talagang hindi mo natatandaan? Nagdaan ka sa harapan namin ni Tiyo noon. May pinuntahan ka yata. Nagmamadali ka.’’

“Hindi ko matandaan. Busy kasi ako noon.’’

Hindi na nagsalita pa si Drew.

Nakarating sila sa SM North EDSA. Nagtraysikel patungo kina Drew.

Wala pang tao kina Drew.

“Parang walang tao,” sabi ni Gab.

“Nag-obertaym siguro si Daddy. Yung utol ko baka may pinuntahan. Maupo ka muna Gab.’’ (Itutuloy)