Maraming biyaya sa tao ang Diyos
At dito’y kabilang buhay na hikahos;
Sila’y nabubuhay sa dakilang utos
Laging masiyahan sa anumang handog!
Kayong mayayamang sagana sa pera
Maging makatao sa inyong pagasta;
Mga mahihirap ay tulungan sana
At huwag dustain sa kawalan nila!
Mayama’t mahirap dapat magtulungan
Kung may nasasawing mga kapitbahay;
Ang dapat isipin ng kahi’t sinuman
Tulungan ang api – hirap ma’t mayaman!
At kung dumarating malaking pagsubok
Mayaman at dukha’y dapat na mag-abot;
Ang biyaya’t tulong huwag ipagdamot
Ang makakayaman na taos sa loob!