‘One-stop shop’ (Marketing strategy, fraudulent scheme)

MARAMING remittance center ang nagkalat sa bansa! Kanya-kanyang patalastas sa publiko para maka-BITAG ng mga kustomer na kakagat sa kanilang marketing scheme.

Ito ‘yung ideyang “one-stop shop” o ang pag-aalok ng iba’t ibang serbisyo ng ilang sikat at malalaking negosyo sa loob at labas ng Pilipinas! Ang siste, sila ang bahalang magpo-proseso ng mga bayarin, remittances, booking online, bills payment at iba pang mga kauri nitong transaksyon.

Pero, kuwidaw! Posibleng mapasama kayo sa mga mabibiktima ng mga iligal na remittance center gamit ang kanilang estratihiya!

Marami nang ibinistong bogus na mga “one-stop shop” business ang BITAG! Lahat, itinanggi at hindi kinilala ng mga kompanyang ginamit nila sa kanilang marketing plan.  Kaya ang mga kliyenteng pumatol sa kanilang serbisyo, naputulan ng kuryente, tubig, telepono, internet connection at iba pang mga kauri nito, bago pa man maiayos ang kanilang reklamo!

Ayon sa Asian Bankers Association, mas mataas ng 30-40 porsyento ang transaksyon sa un­registered remittance agents kumpara sa mga lehitimo at rehistrado sa Bangko Sentral ng Pilipinas.

Marami pang mga fly-by-night remittance center ang maglilitawan lalo na at papalapit ang “ber” months.

Wala namang masama sa “one-stop shop” businesses. Hindi layunin ng BITAG na siraan ang ganitong linya ng negosyo lalo na kung lehitimo ang operasyon at walang intensyon na manlinlang ng publiko!

Manood at makinig ng Bitag Live! araw-araw tuwing alas-10:00-11:00 ng umaga sa AKSYON TV Channel 41 at Radyo 5 o via live streaming sa www.bitagtheoriginal.com/bitagsaradyo. Sa mga episode ng PINOY-US Cops – Ride Along at BITAG, ugaliing mag-log on sa www.bitagtheoriginal.com.