Mga kakaibang pagtatago ng illegal drugs (3)

COCAINE NA NASA CAPSULE, NILUNOK --- Hindi sana mabubuking ang illegal drugs na dala ng isang 20-anyos na Irish man sa Sau Paulo, Brazil airport kung hindi ito naging nerbiyoso. Patungong Brussels ang lalaki.

Malapit nang mag-board ang lalaki nang mapansin ng mga pulis na nerbiyos na nerbiyos ito. Nang komprontahin ng mga pulis, lalo nang ninerbiyos at inamin na lumunok siya ng cocaine na nakalagay sa capsule.

Agad siyang dinala sa ospital at pinainom ng pampalabas sa mga capsule. Nang mailabas ang capsules, may kabuuan iyong 72 na ang timbang ay 830 grams.

Kinasuhan ang lalaki. Mabibilanggo siya ng 15 taon.

SHABU SA ELMO DOLL --- Kakaiba ang ginawa ng drug ring leader na si Rigoverto Valle-Sierra para makapagpuslit ng droga mula Colorado patungong California --- inilagay niya ang shabu sa loob ng Elmo doll.

Matagal na umanong minamanmanan ng drug enforcement agency si Valle Sierra. Masyadong madulas at laging nakakawala sa kanilang bitag.

Hanggang sa matiklo si Valle-Sierra. Nakasakay ito sa kanyang kotse nang maispatan ng mga agents. Hindi na nakapanlaban si Valle-Sierra.

Natagpuan sa sasakyan niya ang isang Elmo doll. At nang buksan ang mga iyon, natambad ang shabu na nagkakahalaga ng $864,000.

Kinasuhan si Valle-Sierra.