IPINATAWAG ng Malacañang ang mga kongresista para sa isang tanghalian at ang pangunahing tinalakay ay ang kontrobersiyal ng Reproductive Health (RH) bill. Wala namang direktang sinasabi si President Noynoy Aquino sa nasabing pulong at pananghalian sa mga kongresista. Ang sinabi ni P-Noy, kung siya ay kongresista pa rin, ang magiging boto niya ay pabor sa RH bill.
Wala rin daw direktang ipinangako si P-Noy sa mga kongresista. Ramdam naman ng mga kongresista na sila ay makikinabang kung papaburan ang RH bill. Kasama ni P-Noy ang Cabinet officials na nangangasiwa sa mabilis na paglalabas ng pondo para sa countrywide development fund (CDF) o pork barrel.
Lalong naramdaman daw ng ilang kongresista ang pagkakaiba ng kasalukuyang administrasyon. Ang tanging ipinabaon lang sa kanila ni Pinoy ay malutong na “Thank you” . Malayung malayo raw ito sa nakaraang administrasyon na bukod sa pag-thank you ay may pabaon na “envelope”.
Pero alam n’yo matapos ang nasabing pananghalian sa Malacañang, agad na kumilos ang dalawang Cabinet official. Nag-text agad ang mga ito. Ang umano’y kampo ng mga Obispo na tutol sa RH bill ay may text brigade. Ganito rin pala ang ginawa ng dalawang Cabinet officials.
Kanya-kanyang text ang dalawang opisyal sa kanilang mga kakilala at kaalyadong kongresista na pinapasabing dapat ay agad maaprubahan ang RH bill na nakapending sa Kongreso.
Sino ang dalawang opisyal na ito na nanggagapang sa mga kongresista para paburan ang RH bill?
Ang dalawang Cabinet officials na nanggagapang at nagsasagawa ng text brigade sa mga kongresista para pagtibayin ang RH bill ay si Secretary A at Secretary R as in mga astig at rah-rah boys sa Malacañang.
Sa Senado kahit hindi na siguro manggapang ang dalawang Cabinet officials, mayorya naman ng mga senador ay pabor sa RH bill at makakalusot ito. Ang tinututukan lang ay mga kongresista dahil maraming absent. Abala na sa pangangampanya sa kani-kanilang probinsiya kaya hindi nakakabuo ng quorum.