MANILA, Philippines — Limang katao ang inaresto habang 7 sex workers na minor ang nasagip nang salakayin ng National Bureau of Investigation (NBI) ang isang establisyemento na ‘front’ ang videoke bar na sinasabing nag-aalok ng mga babae para sa sexual services sa Alaminos City, Pangasinan.
Kinilala ni NBI Director (Ret.) Judge Jaime Santiago ang mga suspek na sina Rochelle Cortez; Edmund Lanayog Corpuz; Ramones Jervy Mendoza; Bonifacio Esta; at Jexter Cruz Sison, na ininquest na sa korte dahil sa paglabag sa Republic Act No. 9208 (Anti-Trafficking in Persons Act of 2003 as amended by RA 10364).
Ayon kay Santiago, agad inaksyunan ng NBI – Alaminos District Office (NBI-ALDO) ang natanggap na impormasyon mula sa isang non-government organization (NGO) hinggil sa mga babae kabilang ang mga kabataan na ginagamit sa prostitution sa Shayawayne Videoke Bar.
Nagsagawa ng serye ng surveillance operations ang NBI-ALDO at nakumpirmang may mga menor de edad pang inaalok ang nasabing bar kaya isinagawa ang operasyon nitong Disyembre 12, 2024, katuwang ang iba pang NBI district offices ng NGO at Provincial Social Welfare Development Office (PSWDO) at nasagip ang 10 babae na kinabibilangan ng 7 menor de edad.