MANILA, Philippines — Namatay noon din ang isang Grab driver nang pagbabarilin ng nakaaway na tricycle driver sa parking space kamakalawa ng hapon sa Brgy. Culiat, Quezon City.
Ang nasawing biktima na nagtamo ng dalawang tama ng bala sa katawan ay kinilalang si Patrick Palapag Diosana, 36, ng FFF Extension, Barangay Culiat, Quezon City habang pinaghahanap naman ang suspek na si Rey Awa Olea, 45, alyas Jumong at naninirahan sa Sitio Mabilog, ng nabanggit ding barangay.
Sa salaysay ng saksi sa Quezon City Police District-Criminal Investigation and Detection Unit (QCPD-CIDU), bago nangyari ang krimen, alas-5:00 ng hapon sa Union Drive Extension ng nasabing barangay ay nakita niyang ipinarada ng biktima ang kotse nang biglang dumating ang suspek at walang kaabug-abog na binaril ang una.
Nang bumulagta ang biktima ay tumakas ang suspek patungong New Era TODA dala ang ginamit na baril.
Nabatid sa imbestigasyon na may dating alitan ang biktima at suspek sa parking space sa Union Drive Extension. Tinutugis na ng pulisya ang suspek.