‘Hindi ako mastermind, isa akong victim’ - Guo

MANILA, Philippines — Muling iginiit ni ­Alice Guo na biktima lang siya at hindi mastermind nang sinalakay na iligal na Philippine Offshore and Gaming Operators (Pogo) sa Bamban, Tarlac at Porac, Pampanga.

“Ikaw ba ay mastermind or willing ka bang magsabi kung sino ang nasa likod ng whole ope­ration na ito (Pogo)?” tanong ni Senador JV Ejercito kay Guo sa ika-14 pagdinig ng Senate committee on women.

Tugon naman ni Guo, “Hindi po ako mastermind. Masasabi ko po, isa po akong victim”.

Idagdag pa ni Guo, hindi rin siya “pawn” o ginagamit ng isang criminal syndicate para sa operasyon ng POGO.

“Your honor ‘di naman po sa ginamit. If ever po kung meron po akong naitulong, ano po akong tao, helpful akong tao. Kung meron man po, ‘yun lang po. Sa mga activities po na ginawa or sa mga allegations po, wala po akong kinalaman,” ayon pa sa dating alkalde ng Bamban.

“Hindi [rin] po ako guilty po,” dagdag pa ni Guo.

Nang tanungin ni Ejercito kung meron pang mas guilty o mastermind ng iligal POGO, sinabi ni Guo na, “Your honor I think sa tagal po ng investigation, alam na rin po ng committee po especially chaired by our Madam Chair po who’s really at the back of everything po,” sabi pa ni Guo.