2 menor-de-edad inaresto sa paghagis ng pusa sa dagat para sa content

MANILA, Philippines — Tuluyang nasakote ng pulisya ang dalawang menor-de-edad na siyang nasa likod ng nag-viral sa isang pusang inihagis sa dagat.

Kumalat ang nasabing video noong Miyerkules, Setyembre 18, 2024 at makikita ang menor-de-edad na lalaki na inihagis ang isang pusa patungo sa dagat.

Ang nasabing content ay inasistahan din ng isa pang menor-de-edad na siya namang kumuha ng video.

Agad na kinondena ng Sto. Domingo, Albay Local Government Unit (LGU) ang sinapit ng pusa sa kamay ng dalawang menor-de-edad na lalaki at ipinahanap ang lokasyon ng mga suspek na agad natunton at nasa kustodiya ng Municipal Social Welfare and Development Office (MSWDO).

Pormal na ring nagsampa ng reklamo ang Tabaco Animal Rescue and Adoption (TAARA) sa dalawang lalaking menor-de-edad nasa likod ng viral content.