MANILA, Philippines — Hinihikayat ni dating presidential legal counsel Salvador Panelo si dating Pangulong Rodrigo “Digong” Duterte na tumakbong bise presidente sa 2028 para maging running mate ng kanyang anak na si Vice President Sara Duterte.
Sinabi ni Panelo sa isang pulong balitaan na regular silang nag-uusap ng dating Pangulo at isa siya sa nagsusulong ng Duterte-Duterte tandem sa 2028.
Payo rin aniya sa dating Pangulo na tumakbo munang mayor dahil kailangan siya sa Davao at pagkatapos sa 2028 ay tumakbo siyang bise ng anak na si VP Sara.
Tiyak din aniya na kapag Duterte-Duterte ay babalik lahat ng bumaliktad sa kanila dahil napakalakas nila.
Ayon pa kay Panelo, wala naman direktang tugon sa suhestyon niya ang dating Pangulong Duterte at sa halip ay sinabihan lang siya nito na ituloy ang adbokasiya na Duterte-Duterte.
“Open lang siya sa lahat. Hindi mo siya mako-corner. He will never tell you, ani Panelo. “Magre-respond lang siya pag may clamor,” dagdag nito.