MANILA, Philippines — Tatlong katao kabilang ang dalawang babae ang naaresto sa isang buy-bust operation ng pulisya, kamakalawa sa Brgy. Paliparan 2, Dasmariñas City, Cavite.
Kinilala ang tatlong suspek na sina alyas Marlon, 27, tricycle driver; alyas Bai, 21; at alyas Claire, 21, kapwa dalaga at pawang mga residente ng nasabing lugar. Nakatakas naman ang isa pang suspek na kinilala sa alyas Jomel.
Sa ulat, alas-10:40 ng gabi nang ilatag ng mga otoridad ang buy-bust operation sa kahabaan ng Molino-Paliparan Road sa gilid ng St. Francis College, Brgy. Paliparan 2 kung saan magkakasamang dumating ang apat na suspek.
Nang magkaabutan ay agad pinaligiran ng mga otoridad ang mga suspek subalit nakatakbo si alyas Jomel.
Narekober sa mga suspek ang 1 nakabuhol na transparent plastic bag na naglalaman ng may 100 gramo ng shabu na may halagang P680,000.00 at 8 piraso ng resealable transparent plastic bags na may mga lamang 800 piraso ng blue tablets na ecstasy na may halagang P1,360, 000.00.