MANILA, Philippines — Isang lalaki ang nadiskubreng patay habang nakahandusay sa bangketa matapos na umano’y maatrasan ng isang sasakyan habang naglalakad sa Sampaloc, Manila kahapon ng madaling araw.
Ang biktima ay nakilalang si alyas ‘Angelito,’ tinatayang nasa 55 hanggang 60-taong gulang, at residente ng Don Quijote St., Sampaloc habang ang suspek ay kinilalang si alyas ‘Rafael,’ ng Florentino St., sa Sampaloc.
Sa initial report ng Investigation Section ng Sampaloc Police Station (PS-4) ng Manila Police District (MPD) alas-6:40 ng umaga nang madiskubre ang bangkay ng biktima, na nakahandusay sa bangketa, sa tapat mismo ng gate ng tahanan ng suspek.
Naglalakad umano sa lugar ang testigong si Danilo Soriano, barangay kagawad ng Brgy. 478, nang makita ang bangkay kaya’t kaagad na inireport sa mga otoridad.
Nagsagawa ng backtracking ang mga barangay sa CCTV footage sa lugar, at natukoy na naatrasan ng suspek ang biktima habang minamaneho ang kanyang kulay itim na kotse na nagresulta sa kamatayan ng biktima, alas-5:07 ng madaling araw.