MANILA, Philippines — Inihayag kahapon ng National Disaster Risk Reduction and Management Council (NDRRMC) na 40 lugar ang apektado ng volcanic smog bunga ng pag-aalboroto ng Bulkang Taal sa lalawigan ng Batangas.
Sa report, ang Taal volcano ay nasa alert level 1 bagaman naglalabas ito ng nasa average na 3,355 toneladang sulfur dioxide simula pa noong Agosto 15 kung saan naobserbahan ang pagbubuga ng volcanic fluids mula sa main crater lake ng bulkan.
Nabatid na nasa 2, 400 metro ang taas ng makapal na usok ng bulkan na nasa bahagi ng hilaga at hilagang kanluran ng bulkan.
Ayon sa NDRRMC, bunga ng insaidente ay nakatanggap sila ng ulat na kinansela na ang face-to-face classes at pansamantalang nagsagawa muna ng modular distance learning sa nasasaklaw ng 40 lugar kabilang dito ay 25 sa lalawigan ng Batangas, 10 sa Cavite at 5 naman sa Laguna.
Samantala, umabot na sa Metro Manila ang volcanic smog.
Ito ang kinumpirma ni Aldczar Aurelio,weather forecaster ng PAGASA batay sa direksyon ng hangin na kanilang namomonitor mula sa lalawigan ng Batangas papuntang Metro Manila na kung saan pagsikat ng araw kahapon ay umangat ang smog papuntang atmosphere.