MANILA, Philippines — Sabog ang ulo ng isang lalaki nang pasukin at barilin nang malapitan ng isang ‘di kilalang gunman habang abala ang una sa loob ng isang computer shop sa Brgy. Zapote 3, Bacoor City, Cavite kahapon ng madaling araw.
Dead-on-the-spot ang biktima na kinilalang si Rey Blanco Mahinay, nasa hustong gulang at residente ng nasabing lugar.
Tumakas naman ang suspek matapos ang pamamaril na kinilala sa alyas na “Tolits”.
Sa ulat ng pulisya, alas-3:20 ng madaling araw habang nasa loob ng computer shop ang biktima nang biglang dumating ang suspek na armado ng hindi pa batid na kalibre ng baril.
Lumalabas na nagdire-diretso ang suspek sa kinauupuan ng biktima na abala sa pagko-computer saka malapitang binaril sa ulo.
Bumulagta ang biktima at matapos ang brutal na pagpatay, mabilis na naglakad palabas ng net shop ang suspek at tuluyang tumakas.
Inaalam pa ng pulisya ang posibleng motibo sa krimen kasabay ng pagtugis sa suspek.