Delivery rider naagawan ng baril, napatay

MANILA, Philippines — Namatay noon din ang isang delivery rider nang mabaril ng isang obrero na babarilin umano sana niya, matapos siyang maagawan nito, naganap sa Port Area, Maynila kamakalawa ng gabi.

Kinilala ang nasawi na si Jeffrey Satol, 42, delivery rider, ng Baseco Compound, Port Area, bunsod ng tama ng baril sa iba’t ibang bahagi ng katawan.

Arestado naman sa follow-up operation ang suspek na si Macmod Saban, 28, obrero, ng Baseco Compound, Port Area.

Sa inisyal na pagsisiyasat ng Manila Police District (MPD)- Homicide Section, alas-7:15 ng gabi nang maganap ang insidente sa Block 9.

Bago ang pamamaril ay naglalakad umano si Saban sa naturang lugar, nang bigla na lang siyang lapitan ni Satol.

Sa hindi pa matukoy na dahilan ay bigla na lang umanong nagbunot ng baril si Satol at itinutok ito kay Saban.

Nagawa naman umano ni Saban na agawin ang baril mula kay Satol at kaagad na ipinutok sa kanya, na nagresulta sa kanyang agarang kamatayan.