Drug ops mula Enero-Mayo
MANILA, Philippines — Umabot sa P12.2 bilyon ang halaga ng iligal na droga ang nakumpiska ng pamahalaan sa loob ng limang buwan o mula Enero 1 hanggang Mayo 5 ng kasalukuyang taon.
Ito ang iniulat ni PNP Public Information Office Chief Police Col. Jean Fajardo nang tanungin sa accomplishments ng PNP.
Ayon kay Fajardo, resulta ito ng 17, 099 anti-illegal drugs operation na isinagawa sa loob ng nabanggit na panahon, kung saan naaresto ang nasa 20,920 drug suspects.
Kabilang sa mga nakumpiska ng mga otoridad ay ang mga shabu, marijuana, kush at cocaine.
Sinabi ni Fajardo na simula nang maupo si Pangulong Ferdinand Marcos Jr. noong July 1, 2022, umabot na sa P33.2 bilyon na halaga ng illegal drugs ang nakumpiska ng mga awtoridad.