MANILA, Philippines — Sesertipikahang urgent ni Pangulong Ferdinand Marcos Jr. ang hakbang para amiyendahan ang Rice Tariffication law, partikular ang probisyon na nagpapalawig sa Rice Competitiveness Enhancement Fund o Rice Fund.
Sinabi kahapon ng Pangulo na sa ngayon ay walang kontrol ang National Food Authority (NFA) sa presyuhan ng bigas kaya tumataas ang presyo ng bigas sa mga pamilihan.
Nagpapaligsahan aniya ang mga trader sa pagbili ng mataas na presyo ng palay at walang kontrol ang gobyerno kaya dapat na magawan ito ng paraan.
Sa ilalim ng Rice Tariffication Law, nalisan ng kapangyarihan ang National Food Authority na bumili ng palay at mag-imbak ng reserba kaya ang mga rice trader ang bumibili ng palay sa mga magsasaka at sila rin ang nagtatakda ng presyo kaya mataas ang presyo ng bigas.
Kabilang din sa nais amiyendahan sa Rice Tariffication Law ay ang pagpapalawig pa sa Rice Enhancement Competitiveness Fund o Rice Fund ng hanggang 2030 kung saan P10 billion kada taon ang ginagamit na pondo para mas maraming matulungang magsasaka ang gobyerno.