Internal agreement ni Pangulong Marcos sa China, itinanggi ng DND
MANILA, Philippines — Itinanggi kahapon ng Department of National Defense (DND) na nagkaroon ng “internal agreement” ang administrasyon ni Pangulong Ferdinand “Bongbong” Marcos Jr. sa pamahalaang China sa isyu ng Ayungin Shoal sa pinag-aagawang teritoryo sa West Philippine Sea (WPS) .
`“The Department of National Defense is not aware of, nor is it a party to, any internal agreement with China on Ayungin Shoal since President Ferdinand R. Marcos, Jr. took office,” ayon kay Defense Secretary Gilberto Teodoro Jr. na naghihinalang bahagi ito ng panibagong propaganda ng China.
Ginawa ni Teodoro ang pahayag sa gitna na rin ng pagiging agresibo ng China sa pinagtatalunang teritoryo sa WPS at ang paglutang ng nasabing isyu ay bahagi aniya ng propaganda.
“This is all a part of the Chinese propaganda effort to steer the Filipino people’s attention away from the real issue and cause of the tensions in the West Philippine Sea, which is China’s obstinate refusal to adhere to UNCLOS, which they are a signatory to,” ayon sa Defense Chief.
Kamakailan lamang ay nag-deploy ang China ng 124 na barko at militia ships sa WPS bago pa man simulan ang Multilateral Maritime Exercise, may 12 nautical miles (nmi) ang layo mula sa 200 nmi Exclusive Economic Zone (EEZ) ng Pilipinas sa pinagtatalunang teritoryo.
Nauna rito, sumingaw ang umano’y “gentlemen’s agreement” sa pagitan ni dating Pangulong Rodrigo Duterte at ng China sa Ayungin Shoal kung saan nakahimpil ang nabalahurang BRP Sierra Madre na kanlungan ng mga sundalong nagbabantay sa WPS.
- Latest
