50K jeepney drivers mawawalan ng trabaho – MANIBELA
MANILA, Philippines — Hindi na makabiyahe at tuluyang mawalan ng trabaho sa pagsisimula ng taong 2024 ang nasa 50,000 jeepney drivers sa Metro Manila.
Ito ang sinabi ni MANIBELA President Mar Valbuena na umano ay ang pinakamalungkot na Pasko sa hanay ng libu-libong mga jeepney drivers ngayong taon dahilan sa bubulagain sila ng ‘jobless‘ na status sa Bagong Taon sanhi ng pagtanggi ng mga jeepney drivers at ng kanilang mga operators sa ‘franchise consolidation’ matapos namang magbigay ng ultimatum ang gobyerno na hanggang Disyembre 31, 2023 ng taong ito bilang bahagi ng Public Utility Vehicles (PUV) Modernization Program.
Aminado si Valbuena na lubhang napakahirap ng sitwasyon ng mga jeepney drivers at mga operators dahilan sa masyado umanong mahal ang ipinagpipilitan sa kanilang bilhin na mahigit P2 milyong modernong jeepney na kung tutuusin ay mga mini bus na gawang China.
Inamin na ng mga operators na hindi nila kayang bilhin ang napakamahal na modernong jeepney na bago pa umano mabayaran ng buo ay sira na dahilan sa mahinang klase ito o palpak ang kalidad na laging suki sa talyer kaya malulugi lamang ang mga bibili nito.
Bukod dito, ang operators ay kailangang may 15 units ng nasabing modern jeepney at dito’y mas mapapaboran aniya ang mga malalaking negosyante.
Kaya’t namemeligrong hindi na makabiyahe pa sa Metro Manila ang nasa 50,000 jeepney units gayundin ang iba pang mga UV Express Units bilang resulta ng PUV Modernization Program.
- Latest
