MANILA, Philippines — Walong Pilipino na tangkang pumasok ng Malaysia sa Zamboanga International Seaport (ZIS) ang nasabat ng mga tauhan ng Bureau of Immigration (BI) makaraang magpanggap na mga turista.
Sa ulat, nagtangkang sumakay ang walo sa MV Antonia patungo sa Sandakan, Sabah noong Nobyembre 13. Nagsabi sila na mga turista at magkakaiba ang dahilan ng pagbiyahe tulad na lang ng pagbili ng welding equipment o bibisita sa kaanak o kaibigan.
Ngunit nang sumailalim sa ikalawang inspeksyon, inamin ng walo na plano nilang pumasok sa trabaho sa isang shipyard at engineering firm sa Kuala Lumpur.
Sinabi ni Immigration Commissioner Norman Tansingco na ang pagkakasabat sa walo ay patunay na hindi lamang mga paliparan ang binabantayan nila laban sa human trafficking ngunit maging ang mga seaports.
Ipinasa na sa Inter-Agency Council Against Trafficking (IACAT) ang kustodiya sa walong pasahero para sa kaukulang imbestigasyon. -