MANILA, Philippines — Inihayag ng Philippine Coast Guard (PCG) na libu-libong pasahero at mga trabahador ang naitalang stranded sa iba’t ibang mga pantalan sa Katimugang Luzon at Bicol region dahil sa masamang lagay ng karagatan dulot ng bagyong Karding.
Sa datos ng PCG, nasa 2,519 pasahero, tsuper, at mga cargo helpers ang stranded sa mga pantalan, maging ang 39 na ‘rolling cargoes’, 18 vessels at 15 motorbancas.
May 71 vessels at 35 motorbancas naman ang nakikisilong sa mga pantalan habang hinahagupit ng masamang panahon ang karagatan.
Sa monitoring ng PCG sa mga pantalan sa Southern Luzon kabilang ang Pier 8 sa Tondo, Maynila at 25 pang mga pantalan, nasa ‘moderate to rough’ na ang kondisyon ng dagat. Gayundin sa Bicol region partikular na sa Virac Port.
Patuloy na nagbabala ang PCG sa mga mangingisda at mga operators ng mga pampasaherong bangka na huwag pumalaot hanggang hindi tuluyang lumilisan sa bansa ang bagyo at umaayos ang kondisyon ng karagatan.