Drug bust sa Cavite: 3 pusher todas
MANILA, Philippines — Napatay ng mga otoridad ang tatlong drug pushers matapos nauwi sa shootout ang buy bust operation sa lalawigan ng Cavite, kahapon ng madaling araw at kamakalawa ng gabi.
Sa report ng Cavite Police, alas-11:30 ng gabi nang magsagawa ng operasyon ang mga otoridad laban sa suspect na si Jay-R Felias, 22-25 anyos at residente ng Brgy. Bucana Sasahan, Naic.
Habang isinasagawa ang buy-bust operation ay nakahalata ang suspect na parak ang poseur buyer kaya agad itong bumunot ng baril at nagpaputok na humantong sa shootout na ikinamatay nito.
Narekober sa operasyon ang isang cal. 38 pistol, 11 sachet ng shabu, isang improvised pipe na hinihititan ng marijuana at mga bala ng nasabing baril.
Dakong alas-11:30 rin ng gabi nang isagawa naman ng Bacoor Municipal Police Station (MPS) ang buy bust operation sa Brgy. Habay 1, Bacoor City laban sa suspect na si Michael Macabenta, nasa hustong gulang at nasa drug watch list ng pulisya, subalit nanlaban ito habang inaaresto kung saan nagkaroon ng ilang minutong putukan hanggang sa bumulagta ito.
Sa isa pang operasyon, dakong ala-1:30 naman ng madaling araw nang isagawa ng Tanza police ang buy-bust operation laban sa suspect na si Reynel Raro sa Brgy. Tres Cruses at habang iniaabot ang P500 halaga ng shabu ay nakahalata ang suspect na parak ang kaniyang ka-transaksyon kaya agad itong bumunot ng baril at pinaputukan ang mga operatiba na nauwi sa palitan ng putok na ikinasawi nito. - Cristina Timbang
- Latest
