MANILA, Philippines — Tatlong katao kabilang ang isang aktibong pulis ang dinakip ng mga otoridad sa isang entrapment operation habang tinatanggap ang bayad sa ninakaw na motorsiklo, kamakalawa ng gabi sa Quezon City.
Ang mga inarestong suspek ay kinilalang sina Police Corporal Michael Dela Cruz, 27, residente ng Bagong Silang, Caloocan City at nakatalaga sa Novaliches Police Station (PS 4); Allan Hermosa, 37, ng Camarin Caloocan City, at Carlito Felicitas, 32 ng Malaria, Caloocan City.
Sa imbestigasyon ng pulisya, humingi ng police assistance ang biktimang si John Ernie Abelardo, 27, ng Binangonan, Rizal matapos makita niya ang mga spare parts ng kanyang motor na naka-post sa facebook ni Hermosa at ibinibenta.
Alas-9:00 ng gabi nang magsagawa ng entrapment operation ang mga tauhan ng Novaliches Police at mismong si Abelardo ang tumayong buyer na ang transaksiyon ay isinagawa sa harap ng isang fast food sa Quirino Highway kanto ng Regalado St., Brgy. Greater Lagro.
Nang magkaabutan ng bayad ay doon na inaresto ang mga suspek at nakumpiska sa ang dalawang spare parts ng 2005 model, asul na Suzuki Shogun motorcycle (No. XI3656).
Nabatid na ang motorsiklo ni Abelardo ay ninakaw habang nakaparada sa supermarket sa Gen. Luis St., Brgy. Nova Proper noon pang April 13, 2019.