MANILA, Philippines — Nasugatan ang siyam na estudyante makaraang aksidenteng gumuho ang covered court ng kanilang eskuwelahan sa Brgy. Sinubong, Zamboanga City, kahapon ng umaga.
Ang mga nasugatang biktima ay kinilalang sina Mikyla Martinez, 14; Jenelyn Ebag, 15; Shaina dela Cerna, 19; Reyselin Cruz, 16; Jubilee Soler, 15; Rica May Busmeon, 15; Mica Macaso, 16; Joy Mae Impen,15; at Radzmea Jainal, 15; pawang mga Grade VII at IX student ng Labuan National High School.
Sa ulat ng pulisya, bago nangyari ang aksidente dakong alas-8:30 ng umaga ay kasalukuyang nagkla-klase sa covered court ang mga estudyante sa pangunguna ng guro nilang si Ms. Sherley Fonollera nang bigla na lamang umanong bumigay ang covered court na ikinasugat ng mga estudyante.
Nabatid na napuno ng tubig ang covered court dahilan sa mga pag-ulan sa lungsod nitong mga nakalipas na araw kung saan humina ang pundasyon nito kaya’t tuluyang bumagsak.