MANILA, Philippines — Dalawang drug pusher ang nasawi habang tatlo ang nadakip sa isang drug bust operation ng mga otoridad kamakalawa ng gabi sa Brgy. Molino 4, Bacoor City, Cavite.
Ang dalawang napatay na suspek ay kinilalang sina Narciso Briggs, 38; at si Leonard Imas, 37, kapwa residente ng Citihomes Subdivision, Phase 3, Barangay Molino 4, Bacoor City, Cavite.
Ang tatlong naaresto ay kinilalang sina Roland Tabing Bordoy, 46, ng Tagle Compound, Brgy. Pasong Buaya 2 Imus City; Paulo Ramos, 30, ng Brgy.Buot, Tanauan City Batangas at Richard Balakit, 31.
Batay sa ulat, dakong alas-10:30 ng gabi nang ikasa ang drug bust operation labang sa mga suspek at dito ay umaktong buyer ang isang pulis.
Nang magkakaabutan ng items ay nakatunog ang mga suspek na pulis ang ka-deal nila kaya’t nagtatakbo ang mga ito at nakipagbarilan sa kapulisan.
Tumagal ng limang minuto ang barilan na kung saan ay nasawi ang dalawang suspek at naaresto ang tatlo pa.